潮文共賞第36話 ︳差d死 尋晚搭港鐵比人捉我食野 ︳

「潮」是潮流的潮，「文」是網絡文章的文，只要夠爆、夠頂癮、夠貼地、夠好笑，任何文章都可以是潮文。
生活那麼苦，「潮文共賞」由謝遜聲音導航，望為諸位添上一點甜，絕對有益身心健康﹗

第36話﹕差d死 尋晚搭港鐵比人捉我食野

特別嗚謝：高登會員有綠人

⬇️ 原文 ⬇️
我本身住荃灣, 係響灣仔返工, 日日返工放工都搭港鐵. 我習慣由頭搭到尾, 唔會轉東涌線, 因為又要等車, 又冇位坐, 又行得遠.
咁我尋日放工就如常咁搭車啦. 尋日大老細帶左成班客上公司度, 又要我帶佢地四圍睇野(我做野間公司係大機構黎), 行足成日, 做足成日, 完全冇停過. 我買左盒沙律做早餐都唔得閒食, lunch又冇時間食. 到佢地走晒, 我又要執手尾, 結果臨尾全公司走淨我一個. 個肚鬼咁餓, 諗住食返今朝盒沙律, 點知變壞左, 唉……跟住我望下鐘, 原來已經12點幾! 死, 要趕尾班車, 跟住拿拿聲走.
我搏老命咁跑去地鐵站, 好在趕得切.

我一上車, 即刻坐低抖返順條氣先, 好在當時冇咩人, 我都仲有位坐. 坐我隔離係一個o靚仔, 十七, 八歲度, 面紅紅, 成浸酒除, 應該飲完酒黎.
可能係成日冇食野, 又做完激烈運動既關係, 我覺得自己有d暈暈地, 個肚仲打鼓. 但係我當時又冇水又冇野食響身, 夜媽媽, d舖頭又刪晒, 果刻我真係有d驚.
突然間, 我醒起個袋應該有包香口膠未食晒, 跟住我就即刻拎包香口膠出黎. 我一打開, 包野淨返10粒, 我諗住一野食晒佢. 但係呢個時候, 我隔離個男仔同我講: 可唔可以比兩粒我?

當時我心諗, 我已經餓到爆, 得返香口膠醫肚, 你去完飲酒咁爽, 仲想我分比你食? 啋你都傻!
跟住我一野倒晒落個口度, 冇理佢.
我怕佢再撩我講野, 話晒佢飲醉酒, 點知佢會做d咩? 於是我就拎個ear phone出黎, 插落個電話度扮聽歌. 其實就冇開既, 因為冇乜電.
咁個男仔都冇再理我, 大家一路搭車. 點知搭搭下……

去到美孚, 隔離個男仔好似想嘔咁, 跟住佢拎左支可樂出黎飲咗一啖, 咁就瀨野了!
企響近門有個男人走埋佢身邊, 佢拎左張証出黎, 話係港鐵職員, 車廂內及車站入閘範圍係唔可以飲食, 仲話要罰個男仔錢.
我即時勁淆底, 因為我個口都食緊野.
我個口即刻唔郁扮冇事, 希望個職員唔發覺啦!

我就扮訓著覺, 然後暗中半擘大眼睇住佢地兩個, 靜觀其變.
個職員問個男仔攞身份証, 抄一大輪後, 就比咗張紙佢, 跟住就行開, 準備落車.
我心諗: 好在過到骨!
點知響個職員踏咗一隻腳落車時, 個男仔叫住佢: 咪住, 佢都食野喎, 點解你唔捉埋佢?
頂佢, 竟然篤我出嚟!

個職員聽到, 即刻行返轉頭, 走左過黎我身邊.
佢一行埋黎就問我: 先生, 你係咪響車廂範圍內飲食?
我隔離個男仔: 佢食緊香口膠呀, 成包添呀, 唔信你叫佢擘大口吖!
我果時扮緊聽歌, 跟住我就好醒目咁, 扮聽唔到佢地兩個講野. 當然個口冇郁到啦.
職員: 先生, 麻煩你張開口睇睇.
我就繼續扮聽唔明, 果時都到葵芳, 諗住hea多陣都落車, 到時可以甩身.

呢個時候, 我隔離個男仔突然伸隻手埋黎, 除低我一邊耳機, 同我講: 擘大口比人睇下啦!
響果一刻, 我實在好驚, 我諗住即刻吞左落肚算數, 但係我細個受過教育香口膠係唔可以吞落肚, 如果唔係會痴住d腸. 不過當時環境唔容許我顧慮咁多, 死就死啦, 照吞. 但係因為太大舊關係, 而且個心又驚緊, 我竟然吞唔落.
佢地兩個, 就響我身邊係咁催我. 職員: 先生, 唔該你合作d.

我當時個心沉一沉, 諗住今次實斷正, 唔通真係要比佢捉到?
我靈機一觸, 即刻伸手除埋另一邊耳機, 扮作若無其事咁, 就響過唔夠1/10秒, 我極速lur左舊香口膠落隻手度. 跟住我就好大方咁擘大口比個職員睇, 個職員睇到冇野, 就話: 唔該晒, 唔好意思, 先生.
我話: 唔緊要.
跟住個職員想走, 但個男仔又叫住佢: 響隻手度!

跟住個職員又行返轉頭, 我就比隻左手佢睇, 冇野.
隔離個男仔就想捉住我隻右手, 好在我身手敏捷, 縮開左, 但個職員叫我攤開手以示清白.
我當時勁淆底, 但係當下我個腦突然出現左一樣野, 冇錯, 係高登其中一個post! 我記得有會員講過, 話如果身體不適, 暈, 響車度飲食係情有可原, 係可以求情既, 於是我就即刻扮暈.

我叫一聲"哎吔", 然後順勢挨咗落隔離個男仔度, 隻右手就好自然咁響佢條褲腳度high一high. 舊香口膠就神不知鬼不覺咁抹咗落佢條褲度.
跟住個即員捉住我隻手睇睇, 冇野.
然後就弄假成真, 我真係餓到暈咗.
到我醒返, 我已經訓咗響地鐵站出面.

~完~

APPLE ● SPOTIFY ● YOUTUBE 等各大平台登場。

----------
【SOCIAL MEDIA。讚好謝遜】
✅ linktr.ee
--
Hosting provided by SoundOn